காவிரி ஆணைய கூட்டம் : மேகதாது குறித்து விவாதிக்க தமிழக அரசு எதிர்ப்பு - சுப்ரீம்கோர்ட்டில் மனு தாக்கல்

28 Views 07-06-2022

சென்னை: டெல்லியில் நடைபெற உள்ள காவிரி மேலாண்மை ஆணைய கூட்டத்தில் மேகதாது அணை கட்டுமானம் தொடர்பாக விவாதிக்க தமிழ்நாடு அரசு கடும் எதிர்ப்பு தெரிவித்துள்ளது. மேலும் இது தொடர்பாக உச்சநீதிமன்றத்தில் தமிழக அரசு மனுத் தாக்கல் செய்துள்ளதாக தமிழ்நாடு நீர்வளத்துறை அமைச்சர் துரைமுருகன் தெரிவித்துள்ளார்.

டெல்லியில் ஜூன் 17-ந் தேதி காவிரி நீர் மேலாண்மை ஆணையக் கூட்டம் நடைபெற உள்ளது. இந்த கூட்டத்தில் காவிரி ஆற்றில் மேகதாது அணை கட்டுகிற கர்நாடகாவின் திட்ட அறிக்கை குறித்து விவாதிக்கப்பட இருப்பதாக தகவல்கள் வெளியாகின. காவிரி ஆணையக் கூட்டத்தில் மேகதாது அணை குறித்து விவாதிக்க தமிழக அரசியல் கட்சிகள் கடும் எதிர்ப்பு தெரிவித்திருந்தன.

இந்த நிலையில் தமிழக நீர்வளத்துறை அமைச்சர் துரைமுருகன் இன்று வெளியிட்ட அறிக்கையில், காவிரி ஆணையக் கூட்டத்தின் விவாதப் பொருள் பட்டியலில் இருந்து மேகதாது விவகாரத்தை நீக்க வேண்டும் என தமிழக அரசு தெரிவித்துள்ளது. மேலும் காவிரி ஆணையக் கூட்டத்தில் மேகதாது விவகாரத்தை விவாதிக்க கூடாது என உச்சநீதிமன்றத்தில் இன்று தமிழக அரசால் புதிய மனுத் தாக்கல் செய்யப்பட்டுள்ளது எனவும் கூறியுள்ளார்.

REPORTED BY A.BALAMURUGAN